|
Лілеі студзеня
|
|
Да партрэта Ніны Мацяш
|
Выплыла песьня зь Бярэсьця бярозавага:
«Выйдзі, дзяўчына, ня бойся марозу...»
А маразы ўсю ноч рыпелі,
Белым-бела на зямлі,
Ці то белыя лілеі
Ў Чорна возера зайшлі?
Не было, каб так марозіла!
Не было, каб так пякло!
Арабінай днела позьняю
У агеньчыках сяло.
Завірухай разгайданыя,
Нагадаўшы карагод,
Йшлі лілеі, закаваныя
У аглухлы тоўсты лёд.
Йшлі па засьнежжы паперы,
Па наступным і былым.
...А боты Золушкі былі
Трыццаць шчыльнага памеру.
|
|
